معلومات اللعبة
شروط الاستخدام
آخر تحديث:
عن اللعبة
قعدة مصلحة لعبة للتسلية من عادل جمال محمد عبد الله، مطوّر فرد في مصر، وبتلعبها زي ما هي.
بنطوّرها باستمرار، فممكن القواعد والأرقام تتغيّر من إصدار للتاني.
العملتين
«عملة» الفضية جوه الماتش، واسمها الكامل «كل سنة وانت طيب»، وبتخلص معاه.
«لحلوح» الدهبية رصيد دايم بتصرفه في المتجر.
الاتنين مالهمش قيمة نقدية، ومايتحوّلوش لفلوس، ومفيش بيع ولا شرا ليهم برّه اللعبة.
الشراء بفلوس حقيقية
تقدر تشتري لحلوح أو «اعمل شخصيتك» من المتجر اللي في اللعبة.
الدفع من متجر آبل أو جوجل وبشروطه، والسعر بيظهر قبل ما تأكد.
اللحلوح بنحفظها على جهازك ونسخة منها على سيرفرنا، وبترجع بكود الاسترجاع لو غيّرت الجهاز.
ومابترجعش لو مسحت حسابك.
«استرجاع المشتريات» بيرجّع «اعمل شخصيتك» بس.
والاسترداد بتطلبه من آبل أو جوجل بشروطهم، وده مايأثرش على أي حق ليك في قانون بلدك.
لو سنك أقل من 18 سنة، اشتري بإذن ولي أمرك.
الأوضات
اللي بيعمل الأوضة هو اللي بيختار إعداداتها.
أي لاعب يقدر يسيب الماتش في أي وقت من زرار «اطلع من الماتش»، والماتش اللي ماخلصش مفيش عليه نقط.
السيرفر مابيتحققش من كل حركة لعب.
قبل الأونلاين
اسمك بيظهر لكل اللي في الأوضة.
ممنوع الأسماء والتصرفات اللي فيها شتيمة أو إهانة أو تحرّش.
لما بتدخل الأونلاين وتضغط «موافق»، انت موافق على الشروط دي.
الاحترام
ممنوع تختار اسم أو تعمل حاجة فيها شتيمة أو إهانة أو تحرّش أو انتحال شخصية حد.
تقدر تعمل بلوك لأي لاعب: مش هتشوف إيموجيهاته ولا هداياه، واسمه عندك «لاعب محجوب»، وأوضته مش بتظهرلك.
ولو دخل أوضة انت صاحبها بنطلّعه منها.
بس ممكن يبقى في أوضة تدخلها.
وتقدر تبلّغ عنه من زرار «بلاغ».
بنراجع البلاغات كل يوم قدر الإمكان، ونقدر نغيّر الاسم المسيء أو نمنع الجهاز المبلّغ عنه من الأونلاين.
حقوق اللعبة
اللعبة وشخصياتها وكروتها ورسوماتها ونصوصها ملك صاحب المشروع أو مستخدمة بإذن أصحابها، ومتاحة للعب الشخصي بس.
ممنوع نسخها أو إعادة نشرها أو بيعها.
شخصيات حقيقية
بعض الشخصيات (اللي عليها ختم «مبني على شخصية حقيقية») مبنية على ناس حقيقيين وافقوا على كده.
الرسم كاريكاتير للهزار، مش وصف حقيقي ليهم.
أغلب رسومات اللعبة وبعض أصواتها عملناها بأدوات ذكاء اصطناعي.
وزرار إنستجرام على الشخصية بيفتح حسابه برّه اللعبة، وزراير إنستجرام التانية بتفتح صفحة اللعبة.
لو حد منهم سحب موافقته، هنشيل الشخصية في أقرب تحديث، ولو كنت شاريها هنرجّعلك تمنها لحلوح.
من غير ضمان
في حدود اللي القانون يسمح بيه، مفيش ضمان إن اللعبة هتشتغل من غير أعطال، ولا إن حسابك مايضيعش: بنحفظ نسخة تانية عشان نرجّعه، بس مابنضمنهاش.
وده مايلغيش أي حق ليك كمستهلك في قانون بلدك.
الشروط دي ماشية على القانون المصري.
لو غيّرنا الشروط دي هنكتب التغيير هنا بتاريخه، ولو كان كبير هنعرّفك جوه اللعبة.
للتواصل
المسؤول عن بياناتك عادل جمال محمد عبد الله، مطوّر فرد في مصر.
لأي سؤال أو طلب يخص بياناتك ابعتلنا على hello@maslahagame.com.
وصفحة اللعبة في إنستجرام maslaha_game للأخبار بس، مش لطلبات البيانات.